Optimismo kaj sano: praavoj pravis
Tiun ĉi sonartikolon verkis kaj produktis Paŭlo S.Viana el Brazilo
 | optimismo_sano.mp3Listen on Posterous |
La artikolo fokusas la influon de pozitivaj sentoj je la risko de koraj kaj angiaj malsanoj. Oni traesploris ducent aliajn sciencajn studojn pri tiu sama temo kaj konkludis, ke tiaj sentoj estas klare sanprotektaj. Pozitivaj emocioj, precipe optimismo, montris protektan efikecon kaj eĉ mildigis sanproblemon, se ĉi tiu jam okazis. Optimistoj suferis riskon malpli altan je 50 procentoj, kompare al neoptimistoj. Krom la rekta influo de optimismo al sanstato, oni observis, ke optimistoj kaj feliĉuloj pli ofte havas sanigajn vivstilojn, kio inkluzivas la kutimon praktiki korpekzercojn, bone manĝi kaj bone dormi. Unu el la aŭtoroj de la artikolo, Julia Boehm, substrekis, ke la statistikaj ciferoj indikas, ke optimismo, vivokontenteco, kaj feliĉo rilatas al sanprotekto sendepende de aĝo, socia stato, korpa pezo, tabakfumado kaj aliaj kutimoj. Krome, ŝi emfazis, ke damaĝa influo de negativaj sentoj (deprimiĝo, angoro, kolero) jam de longa tempo estas observitaj, sed unuafoje oni science esploras la influon de la pozitivaj. Kaj ke ĉi tiu studo ne celis la foreston de negativaj pensoj, sed la aktivan ĉeeston de la pozitivaj. Ŝi do konkludas, ke plifortigo de tiaj sentoj per diversaj manieroj estas forte konsilinda por havigo de kora sano.
Montriĝis do, ke niaj praavoj pravis!
Sekve, ni gratulu la iniciatinton de la Esperanta RetRadio, Sinjoron Anton, kiu dekomence starigis kiel normon por niaj sonartikoloj elektadon de ĝenerale agrablaj, bonhumoraj kaj pozitivaj temoj. Tiel, oni atingas ne nur pli fluan kaj naturan uzadon de nia lingvo, sed krome pli da bonfarto por niaj koroj.
Sanon al vi!
Comments
Post a Comment