Traserĉu tiun blogon

2012-01-14

Kial ne legale?

Kial_ne_legale

Tiun ĉi sonartikolon verkis kaj produktis Andreo Bach el Gdynia en Pollando
Kial_ne_legale.mp3 Listen on Posterous

En la malfacila tempo, kiun kelkaj nun travivas kaj aliaj ne, la homoj provas trovi solvojn, kiuj plifacilagas aŭ plibonigas ilian vivon. Ĉiutage ni povas eksciadi pri diversaj tiaj ekzemploj. Tio komencas ĉe registaroj, kiuj serĉas ŝparindaĵojn kaj aldonajn enspezojn, kaj tio iras tra diversaj sciencistoj kiuj pripensas ĉiam pli multajn interesajn inventaĵojn, kaj tio finiĝas ĉe ordinaraj homoj, kiuj klopodas travivi malgraŭ la nesufiĉa enhavo de sia monujo.
Ni do iom rigardu unu fenomenon, kiu depende de la loko, kie ĝi okazas, estas aprobata aŭ ne estas, kaj eĉ pli - estas legala aŭ ne! Universale konata estas la fakto, ke fuelo, kara al la koro de ĉiu posedanto de aŭtomobilo, fariĝas ĉiam pli kara (alidirite: multekosta). Kompreneble tiu ĉi fakto implikas diversajn efikojn. Kelkaj homoj pro tio ĉiam malpli multe veturas, aliaj devas ĉiam pli multe pagi por povi ĝui la aŭtoveturadon, ankoraŭ aliaj plialtigas la prezojn de la varoj, kiujn ili liveras.
Lastatempe mi legis en gazetoj, ke jam preskaŭ svarmas anoncoj pri la ebleco vendi aŭ aĉeti eluzitan kolzan oleon, kies prezoj pro tio estas minimumaj, kelkoble malpli altaj ol normale. Estas nemalfacile diveni, ke temas pri la elzuado de la oleo kiel fuelo precipe en pli malnovaj aŭtomobiloj kun dizelaj motoroj, do en aŭtoj kiuj ne postulas altkvalitan fuelon. Mi ne priskribos la procedon tro detale, kvankam ĝi estas neniu sekreto. Mi nur mencios, ke sufiĉas munti iun rete aĉeteblan aparataron, por povi senĝene verŝi la iom alifaritan oleon al fuelujo. La unusola diferenco estas tio, ke kiam oni veturas post la veturilo, kiu uzas ĝin, oni povas fariĝi malsata, pro la odoro de frititaj terpomoj.
Alia maniero produkti ĉi tiun eksteroficialan fuelon estas mem kultivi kolzon, kio preskaŭ nuligas kostojn de la oleo. Mi povis legi artikoleton pri unu agrikulturisto, kiu danke al tio movigas sian aŭtomobilon kaj ĉiujn siajn maŝinojn, sed li iom specializiĝis, ĉar ĉi gazeto priskribis lian aparataron, ebligantan produkti verŝajne sufiĉe sekuran fuelon. Mirigis min, ke oni aperigis eĉ la personan kaj familian nomojn de la agrikulturisto kun lia fotografaĵo. Ĉu do oni ne timis? La uzado de la fuelo sen pagi akcizon estas ja en Pollando nelegala. En la gazeto, kies eldonkvanto estas grandega, oni sciigis al la legantoj eĉ la preskribon pri la produktado.
La temo ne estas malkovro de Ameriko. La oleon, en kiu pli frue estis frititaj terpomoj, vastskale elprofitas por siaj aŭtomobiloj fame konata McDonald's. Antaŭ kelkaj monatoj la filio de la konzerno en Unuiĝintaj Arabaj Emiratoj subskribis kontrakton kun la konzerno Natural Fuels, kiu laŭ ĝia mendo taŭgigas la restoracidevenan fuelon. Tie tamen ĝia uzo estas tute legala.
Certe la opinioj pri la temo estas dividitaj, depende de la bonstateco de la opinidonanto. Oni povas diri, ke se oni ne kapablas pagi la impostitan fuelon, oni ne povas posedi kaj uzi tiun aŭ alian maŝinon. Miaopinie, estas demandinde, kial la ideema homo, kiu investas siajn fortojn kaj rimedojn, por produkti por sia propra uzo iun bonaĵon, ne povas fari tion legale? Mi esperas, ke alvenos tempo, kiam simila entreprenemo ne estos kontraŭleĝa, kiam ĉiuspeca nesufiĉo ĉesos ekzisti. Sed por interkompreniĝi ĉiusfere, ni bezonas volon, ĉu ne?
_____________________________________________
Programa MIA AMIKO... Participe!


No comments:

Post a Comment